Şeyxülislam Allahşükür Paşazadə avqustun 25-də Fələstin dövlətinin ölkəmizdə yeni təyin olunmuş Fövqəladə və Səlahiyyətli səfiri Əhməd Metanini qəbul edib.

Səfiri səmimi salamalayan QMİ sədri A. Paşazadə xalqlarımızı dostluq və qardaşlıq əlaqələrinin birləşdirdiyini vurğulayaraq. Şeyxülislamlığı dövründə hər zaman Fələstin ilə əlaqələrinin olduğunu qeyd etdi. Fələstin xalqının mərhum lideri Yasir Ərəfatla İslam Əməkdaşlığı Təşkilatı müstəvisində görüşlərini xatırlayan Şeyxülislam A. Paşazadə, Azərbaycan dövlətinin Fələstinlə bağlı beynəlxalq tədbirlərdə fəal iştirakını, habelə ölkəmizdə təşkil olunmuş dəstək konfransından danışdı. Bildirdi ki, Azərbaycan hər zaman, bütün beynəlxalq müstəvilərdə Fələstin xalqının haqlı tələbini, İsrail-Fələstin münaqişəsinin “iki dövlət prinsipi” və BMT-nin müvafiq qərarları əsasında həllini dəstəklədiyini, ölkəmizin Fələstinə humanitar yardımını xatırladan Şeyxülislam A. Paşazadə hal-hazırda Qəzzada baş verənlərdən, humanitar böhrandan  məyus olduğunu, problemin sülh yolu ilə həlli üçün dualar etdiyini bildirdi. 

Şeyxülislam A. Paşazadə yeni səfirə qarşıdakı fəaliyyətində uğurlar dilədi, ölkəmizdə fəaliyyəti dövründə xalqlarımız arasında münasibətlərin, dövlətlərarası əməkdaşlığın genişləndirilməsi üçün əlindən gələni əsirgəməyəcəyinə ümidvar olduğunu bildirdi. 

Səfir Ə. Metani Azərbaycan Respublikasının Prezidenti İlham Əliyevə etimadnaməsini təqdim etdikdən sonra ilk olaraq Şeyxülislam A.Paşazadə ilə görüşü arzuladığını ifadə etdi və Fələstin Müftisi Məhəmməd Hüseynin salamlarını Azərbaycanın dini liderinə çatdırdı. Səfirliyi müddətində Azərbaycan və Fələstin dini rəhbərlərinin görüşünü təşkil etməkdən böyük məmnuniyyət duyacağını bildirdi. 

Daha sonra Fələstinli səfir Qəzzada baş verənlər barədə fikirlərini bölüşdü. Azərbaycanın gələn il evsahibliyi edəcəyi İslam Əməkdaşlıq Təşkilatının növbəti Zirvə görüşünə toxunan səfir Fələstinin də bu toplantıda Fələstinə dair əhəmiyyətli qərarların veriləcəyinə ümidvarlığını ifadə etdi.