Dekabrın 18-də Qafqaz Müsəlmanları İdarəsinin sədri Şeyxülislam A. Paşazadə G20 Dinlərarası Forum Assosiasiyanın prezidenti Kol Dürhamla videokonfrans formatında görüşüb. 
Səmimi şəraitdə keçən videogörüşdə tərəflər qarşılıqlı etimada və ortaq məqsədlərə əsaslanan əməkdaşlığın səviyyəsindən məmnunluq ifadə ediblər. Assosiasiyanın və onun prezidentinin fəaliyyətini yüksək qiymətləndirən QMİ sədri Assosiasiyanın dünyanın müxtəlif yerlərində təşkil edilən beş forumunda ardıcıl olaraq iştirak etdiyini və bu platformanın işinə öz töhfəsini əsirgəmədiyini qeyd edib. G20 Dinlərarası Forumlarında iştirakını bu platformaya və onun sülh məramlı fəaliyyətinə yüksək ehtiramının sübutu kimi qeyd edən A.Paşazadə vurğulayıb ki, insan həyatına, bəşərin mövcudluğuna təhdid və təhlükələrin artdığı müasir dövrdə siyasi, ictimai və dini liderlərin birgə səylərinin artırılması və qlobal dialoq zərurətindən irəli gəlir. 
Vurğulanıb ki, son illərin ənənəsi - Böyük İyirmilik ərəfəsi Dinlərarası Forumlar dövlət və din nümayəndələrinin birgə əməkdaşlığının səmərəli praktiki təzahürünə çevrilmişdir. G20 Dinlərarası forumların işində fəal və davamlı iştirakına görə Şeyxülislam A.Paşazadəyə səmimi minnətdarlığını bildirən Kol Dürham Şeyxülislamla bu yaxınlarda ABŞ-a səfəri çərçivəsində keçirilən görüşü zamanı G20 Dinlərarası Forumunun strukturunda nəzərdə tutulan islahatlarla bağlı Şeyxülislamın böyük təcrübəsinə istinadən ondan öz tövsiyələrini verməsini xahiş etdiyini və proses əsnasında öz aralarında məlumat mübadiləsi aparmaq barədə razılığa gəldiklərini, bu mövzuda cari ayın əvvəlində ilk müzakirələrini  xatırlatdı.
Şeyxülislam A. Paşazadə bu yaxınlarda iştirak etdiyi Ər-Riyadda keçirilən BMT Sivilizasiyalar Alyansının XI Global Forumu çərçivəsində tədbir  iştirakçıları, BMT, habelə Səudiyyə Ərəbistanı Krallığının rəsmiləri ilə ikitərəli görüşlərində G20 Dinlərarası Forum Assosiasiyası nəzdində müxtəlif dinlərin qlobal Məşvərət Şurasının yaradılması ideyasını müzakirə etdiyini cənab K. Dürhamın diqqətinə çatdırdı və gəldiyi qənaətlərlə, tanınmış din xadimlərinin bu mövzuya dair fikir və təklifləri ilə bölüşdü.  
 Assosiasiyanın prezidenti Kol Dürham Şeyxülislam A.Paşazadənin təklif olunan islahatlarla, ələlxüsus, Dinlərarası forum nəzdində müxtəlif dinlərin tanınmış nümayəndələrini bir araya gətirəcək və daimi fəaliyyət göstərəcək dinlərarası şuranın yaradılması mexanizmi ilə bağlı fikir və tövsiyələrini nəzərə alan layihə ilə QMİ sədrini tanış etdi. Tərəflər Şuranın strukturu, üzvlərinin müəyyən olunması, qərarqəbuletmə mexanizmləri, qarşıdakı məsləhətləşmələr və 2026-cı ildə ABŞ-da keçiriləcək G20 ərəfəsi növbəti Dinlərarası Forum tədbiri ilə bağlı ətraflı müzakirə apardılar. 

QMİ-nin Mətbuat Xidməti

*Materiallardan istifadə zamanı sayta istinad vacibdir!