Martın 14-də Qafqaz Müsəlmanları İdarəsinin sədri Şeyxülislam Allahşükür Paşazadə Belarus Respublikasının Azərbaycan Respublikasındakı yeni təyin olunmuş Fövqəladə və Səlahiyyətli səfiri Dmitri Pineviçi qəbul edib.
Səfiri ölkəmizdə fəaliyyətə başlaması münasibətilə təbrik edən Şeyxülislam A.Paşazadə ona qarşıdakı fəaliyyətində uğurlar dilədi. Azərbaycan-Belarus münasibətlərinin bütün sahələr üzrə yüksək səviyyədə inkişaf etdiyini qeyd edən QMİ sədri ölkələrimiz arasında dini-mənəvi əlaqələrdən danışdı, Belarusun mərhum dini lideri Mitropolit Filareti xoş xatirələrlə andı. Belarusun dini lideri Mitropolit Veniaminin ötən il Azərbaycandakı beynəlxalq Forumda iştirak etdiyini qeyd edən QMİ sədri əlaqələrin daha da intensivləşməsinin vacibliyini vurğuladı, dost, qardaş, tarixi əlaqələrə malik xalqlarımızın, dövlətlərimizin tərəqqi və rifahı, dövlət rəhbərlərimizin uğurları üçün dualar etdi.Şeyxülislam A. Paşazadə səfirə Azərbaycandakı dini konfessiyaların Məşvərət Şurası barədə məlumat verdi.
Müqəddəs Ramazan ayı münasibətilə Şeyxülislam A. Paşazadəni təbrik edən Belarus səfiri səmimi qəbul və xoş arzular üçün təşəkkürlərini bildirdi. Səfir A.Paşazadəyə ehtiramını bildirərək, Azərbaycanda olduğu qısa müddət ərzində ölkəmizdəki dini icmalar arasında harmoniyalı mühit, multikultural həyata valeh olduğunu, dövlətin dini icmalara qayğı və diqqətinə şahidliyini xüsusi vurğuladı. Daha sonra Mitropolit Filaretə həsr olunmuş nəfis kitabları Şeyxlislama təqdim etdi.
QMİ-nin Mətbuat Xidməti
*Materiallardan istifadə zamanı sayta istinad vacibdir!