Dekabrın 24-də Qafqaz Müsəlmanları İdarəsi sədrinin birinci müavini, müfti Salman Musayev ölkəmizdə səfərdə olan Türkiyə Cümhuriyyətinin Diyanet işləri başkanının müavini Fatih Mehmet Karacanı qəbul edib.

         Qonaqla səmimi görüşən müfti Salman Musayev Qafqaz Müsəlmanları İdarəsinin sədri Şeyxülislam Allahşükür Paşazadənin salam-dualarını yetirib. Şeyxülislam həzrətlərinin Türkiyə Cümhuriyyətinin Diyanet işləri başkanı vəzifəsinə yeni seçilən Safi Arpaquşa təbrik məktubu göndərdiyini xatırladıb, başkanı Azərbaycana  səfərə dəvət etdiyini diqqətə çatdırıb. Rəsmi dəvətin yaxın zamanlarda reallaşacağına ümid etdiyini bildirib.

         QMİ ilə Diyanet İşləri Başkanlığı arasında əlaqələrin yüksək səviyyədə olduğunu vurğulayan müfti Salman Musayev bu münasibətlərin son illərdə Türk Dövlətləri Təşkilatının Dini İdarə Rəhbərlərinin Məşvərət Şurası kimi nüfuzlu bir platformada daha da inkişaf etdiyini diqqətə çatdırıb.

         Fatih Mehmet Karaca səmimi qəbula görə təşəkkürünü bildirib, Diyanet işləri başkanı Safi Arpaquşun salamlarını Şeyxülislam Allahşükür Paşazadə həzrətlərinə çatdırmağı xahiş edib.

         Söhbət zamanı TDT Dini İdarə Rəhbərlərinin Məşvərət Şurasının 2026-cı ildə görəcəyi işlər müzakirə edilib, maraq doğuran digər məsələlər ətrafında fikir mübadiləsi aparılıb.

          *Materiallardan istifadə zamanı sayta istinad vacibdir!